جاپان په افغانستان کې د ښوونځیو د بیارغونې لپاره ۲۵ میلیونه ډالره مرسته کوي

افغان غږ خبری آژانس - کابل: د ملګرو ملتونو د ماشومانو وجهي صندوق (یونیسف) د یوې اعلامیې له مخې، ۳۳ زره زده کوونکو ته د زده کړو خوندي چاپیریال برابریږي.
 
یونیسف ویلي چې دا پیسې به د درسي ټولګيو په جوړولو، د تشنابونو په جوړولو، په ښوونځیو کې د لاسونو مینځلو لپاره د اسانتیاوو په برابرولو او د څلور دیوالونو په جوړولو ولګوي.
 
په افغانستان کې د جاپان سفیر تاکاشي اوکادا وویل "هر ماشوم حق لري چې ښوونځي ته ولاړ شي او په خوندي چاپیریال کې زده کړې وکړي."
 
هغه زیاته کړه چې "جاپان په افغانستان کې د ښوونځیو او روغتیايي مرکزونو په جوړولو سره د نجونو او هلکانو د زده کړې او پراختیا ملاتړ کوي".
 
د ملګرو ملتونو د ماشومانو صندوق وايي، د افغانستان په نیمايي دولتي ښوونځیو کې کافي درسي خونې نشته او په سلو کې ۵۸ ښوونځي پاکې اوبه او د لاسونو مینځلو ځای نه لري.
 
دغه اداره وايي، په اوسط ډول د افغانستان په ښوونځیو کې د هرو ۲۴۹ زده کوونکو لپاره یو فعال تشناب لري او یوازې ۴۷ سلنه ښوونځي څلور دیوالونه لري.
 
د دې ادارې په اعلاميه کې راغلي چې د ښوونځيو لپاره څلور دېوالونه مهم دي، ځکه کورنۍ دا ډول ښوونځي خوندي ګڼي او دا کړنه د زده کوونکو په ځانګړې توګه د نجونو د حاضرۍ د ښه کېدو لامل کېږي.
 
په افغانستان کې د یونیسف استازي، فران اکیتا وویل: "کله چې ټولګي د ماشومانو لپاره خوندي او خوندور وي، دوی زده کړې ته هڅول کیږي او له دې نوم لیکنې سره د زده کوونکو د ګډون کچه لوړیږي."
 
هغه زیاته کړه: "په داسې حال کې چې افغان ماشومان د خپلو زده کړو په لاره کې له ګڼو خنډونو سره مخ دي، د افغان حکومت او خلکو ملاتړ خورا مهم دی."
 
د ملګرو ملتونو د پراختیایي پروګرام (UNDP) سره د پراخې ملګرتیا د یوې برخې په توګه، یونیسف وویل چې دا پروژه به د ټولنو او معمارۍ متخصصینو په مرسته پلان، ډیزاین او پلي شي ترڅو کیفیت، پایښت او د مناسبو موادو او تخنیکونو کارول یقیني کړي، په ځانګړې توګه. په هغه ځایونو کې چې د زلزلې، سیلابونو او نورو پیښو له خطر سره مخ دي، ترڅو ډاډ ترلاسه شي.
 
جاپان تر دې وړاندې هم له افغانستان سره د ښوونځیو د جوړولو، د ښوونکو د روزنې او په ښوونځیو کې د روغتیايي خدمتونو د وړاندې کولو په برخو کې مرستې کړې دي.