له ایران سره د اوبو ستونزه د جګړې پر ځای په تفاهم حل شوې ده

افغان غږ خبری آژانس - کابل: د بهرنیو چارو وزارت سیاسي مرستیال مولوي عبدالکبیر نن (اسد ۲۸) له انګرېز استعمار څخه د هېواد د خپلواکۍ د بېرته ترلاسه کولو د ۱۰۴مې کلیزې د نمانځنې په مراسمو کې وویل: "د اوبو مسئله له ایران سره د جګړې پر ځای، په ډیره خوښۍ سره حل شوه." دا له نړۍ سره زموږ د ښې پالیسۍ او تعامل یوه بېلګه ده.
 
د بهرنیو چارو وزارت سیاسي مرستیال زیاته کړه: "موږ به افغانستان په سیاسي ډګر کې ځلانده کړو، ترڅو د نړۍ په کچه سیال شي." موږ به د افغانستان اقتصاد په خپلو پښو ودروو تر څو هیواد له اقتصادي پلوه په ځان بسیا شي.
 
مولوي عبدالکبیر ټینګار وکړ چې اوس نړۍ په دې پوه شوې چې د ډاډمن امنیت او سیمه ییز او نړیوال ثبات لپاره له اسلامي امارت سره تعامل غوره انتخاب دی.
 
هغه په ​​ډاګه کړه، چې زموږ د شل کلن جهاد موخه د اشغال خاتمه او د اسلامي نظام رامنځته کول دي.
 
د يادونې وړ ده، چې نن (اسد ۲۸) د روان کال له انګريزي استعمار څخه د هېواد د خپلواکۍ د بېرته ترلاسه کولو له ۱۰۴مې کليزې سره برابره ده.