د بامیان ولایت سرخجوی، ورس ولسوالۍ کې به نوې ولسوالي جوړه شي

افغان غږ خبری آژانس - بامیان: د بامیان ولایت مقام د مطبوعاتي دفتر د خبر له مخې، د بامیان والي مولوي عبدالله سرحدي په خپله لومړنۍ وینا کې له مسوولینو څخه وغوښتل چې ټول هغه چارواکي چې په دغو غونډو کې یې ګډون کړی و، فعاله وي او د اوسني وضعیت د ښه کولو او د موجوده ستونزو د حل لپاره خپلې ادارې ته وړاندیزونه وړاندې کوي.
 
د باميان ولايت مقام مسوولينو ته د اسلام د احکامو او اخلاقو او د نبوي سنتو د رعايتولو بلنه ورکړه او ويې ويل چې ټول مسوولين بايد له خپلو مامورينو او مراجعينو سره د اسلامي اخلاقو او نبوي سنتو مراعات وکړي او تل د مظلومانو ملاتړي وي.
 
په دې غونډه کې پرېکړه وشوه چې د ورس ولسوالۍ د خلکو د وړاندیزونو او غوښتنو له مخې دې د «سرخ جوی» په سیمه کې د نوې ولسوالۍ د جوړولو او د سیمه ییزو چارو د ادارې د عمومي ریاست له خوا د منظورۍ په منظور ټول اړونده وړاندیزونه وشي.
 
د بامیان والي د خپلو خبرو په یوه بله برخه کې ټینګار وکړ چې ټولې دولتي ادارې مکلف دي چې ژر تر ژره خپل خالي بستونه ور وپيژني او د بامیان د اداري اصلاحاتو او ملکي خدمتونو له ریاست سره په همغږۍ د یوې رڼې او عادلانه پروسې له لارې رقابت پرانیزي.
 
د یادولو وړ ده چې ورس ولسوالي د بامیان ولایت یوه له ګڼ میشتو او لرې پرتو ولسوالیو څخه ده چې شاوخوا ۲۵۵۰ کیلومتره مربع مساحت لري، ۱۰۲۱ کلي، ۱۸۶ پرمختیايي شوراګانې او څه باندې یو لک شل زره وګړي په کې میشت دي. د دې ولسوالۍ ډېری وګړي په کرنه او مالدارۍ بوخت دي.
 
د بامیان ولایت د احصایې، کلیو پراختیا او اقتصاد ریاست د وروستیو شمېرو له مخې د "سرخ جوی" ولسوالۍ څه باندې پنځوس زره نفوس لري او په دې سیمه کې د نوې ولسوالۍ په جوړېدو سره به د دغې ولسوالۍ نفوس کم شي.