د ایران د کورنیو چارو وزیر: افغان کډوال د ایران لپاره امنیتي ننګونه نه ده

افغان غږ خبری آژانس: احمد وحیدي له خبریالانو سره په مرکه کې په ایران کې د افغان مهاجرینو د شمیر او د هغوی د څارنې او تنظیم د څرنګوالي په اړه وویل: موږ دقیق احصایې نه شو ویلای، خو د شمیر په اړه اټکلونه کولای شو. په ایران کې د افغان کډوالو شمېر له پنځو میلیونو ډېر دی.
 
ده په دوام کې وويل: امنيتي ارګانونه خپل کنټرول او څارنه لري، خو د مهاجرينو اداره زياتې څارنې ته اړتيا لري او هيله لرو چې د مهاجرت ملي اداره چې موږ يې وړانديز کړى دى، په پارلمان کې تصويب شي، ځکه چې موږ پياوړي جوړښت ته اړتيا لرو.
 
د ایران د کورنیو چارو وزیر د دې پوښتنې په ځواب کې چې ایا د افغان مهاجرینو دغه شمیر ښايي د ایران لپاره امنیتي ننګونه رامنځته کړي؟ هغه وويل: نه، البته، کېدای شي په هره ټولنه کې امنيتي ستونزې وي، خو په ټوليزه توګه کشفي ارګانونو موږ ته داسې راپور نه دی راکړی او که کوم راپور وي، ورسره به چلند وشي.
 
دا په داسې حال کې ده چې تر دې مخکې د سرطان په ۱۹مه د ایران د اصلاح غوښتونکو یوې ورځپاڼې جمهوری اسلامی ورځپاڼې له یوې خبری آژانس سره د یوه ایرانی خبریال د مرکې په خپرولو سره ویلی و چې افغان کډوال د ایران لپاره امنیتي ننګونه رامنځته کړې ده.