د اطلاعاتو او کلتور وزارت د هېواد د لیکوالانو اثار خپروي

افغان غږ خبری آژانس - کابل: د اطلاعاتو او کلتور وزارت د نشراتو مرستیال حیات الله مهاجر فراهي په کابل کې د کتاب او لاسي صنایعو د نندارتون د پای په مراسمو کې وویل: د دغه ډول نندارتونونو او پروګرامونو جوړول به له موږ سره مرسته وکړي چې خپل خلک او په ځانګړې توګه زموږ ځوان نسل لوستلو ته وهڅوئ.
 
د باختر آژانس د خبر له مخې: داطلاعاتو اوکلتور وزارت د خپرونو مرستيال زياته کړه: نوې تکنالوژۍ او ټولنيزو شبکو په ټوله نړۍ کې د لوست او مطالعې په بهير ناوړه اغيزه کړې ده او زموږ په هيواد کې يې کلتور کمزورى کړى دى.
 
فراهي ټینګار وکړ: موږ باید زیاتې هڅې وکړو چې ځوانان او د ټولنې نور غړي کتاب لوستلو ته وهڅوو ځکه لوستل او کتاب د علم د ترلاسه کولو اساس دی.
 
هغه زیاته کړه: که موږ یوه پرمختللې ټولنه او یو پرمختللی هیواد غواړو، باید د ساینس او ​​پوهې مطالعې او زده کړې ته زیاته پاملرنه وکړو او د اطلاعاتو او کلتور وزارت ژمن دی چې له هغو لیکوالانو سره همکاري وکړي چې اثار یې د خلکو او ټولنې په ګټه وي.
 
 دي دې ته په اشارې سره وويل چې دغه وزارت هڅه کوي په ولايتونوکې دا ډول نندارتونونه او کلتوري پروګرامونه په لاره واچوي چې د لوستلو کلتور ته وده ورکړي .