مجاهد: د اسلامي امارت د محاکمو د فعالیتونو په اړه د یوناما اندېښنه بې بنسټه ده

افغان غږ خبری آژانس - کابل: د اسلامي امارت ویاند ذبیح الله مجاهد نن دوشنبه (ثور ۱۸) په یوه ټویټ کې د یوناما راپور رد کړی او ویلي یې دي: «حقیقت دا دی چې په افغانستان کې قضايي نظام خورا پیاوړی شوی دی. د پخوا په پرتله عدالت تامینېږي او د هېوادوالو حقوق د اسلامي احکامو په رڼا کې په پام کې نیول کېږي.

 

نوموړي دا هم لیکلي: "افغانان پوهېږي چې دلته عدالت راغلی، په پایله کې یې په ټوله کې امنیت تامین شوی، یو شفاف قضايي سیستم رامنځته شوی او د پیاوړتیا لپاره یې هڅې روانې دي."

 

د اسلامي امارت ویاند د افغانستان اوسنی قضايي نظام مثالي او روڼ بللی او ویلي یې دي، چې که پورته ذکر شوي پرمختګونه او لاسته راوړنې له پامه وغورځول شي او د کفر څرګندونه وشي، بې انصافي ده.

 

په افغانستان کې د ملګرو ملتونو د مرستندویه پلاوي دفتر (یوناما) په دې وروستیو کې د "عدالتي مجازاتو او اعدام" په اړه په یوه راپور کې ویلي، چې په تېرو شپږو میاشتو کې په افغانستان کې ۲۷۴ نارینه، ۵۸ ښځې او دوه هلکان په دورو وهل شوي دي.