د لوړو زده کړو وزیر: دیني عالمان دې د پوهنتون د موضوعاتو په تدریس کې برخه واخلي

افغان غږ خبری آژانس - مزارشریف: پرون شنبه (عقرب ۲۹) د اسلامي امارت د لوړو زده کړو وزیر د دغه ولایت له دیني عالمانو سره په مشورتي ناسته کې د پوهنتونونو په زده کړو کې د دیني عالمانو پر ونډې ټینګار وکړ.
 
د هېواد د لوړو زده کړو وزارت سرپرست مولوي ندا محمد ندیم د دیني عالمانو مشورې زموږ لپاره د درناوي وړ وبللې او وویل: د اسلامي امارت د نظام رهبري له دیني عالمانو څخه غوښتنه کوي چې چارواکو ته ښه او نوي نظریات وړاندې کړي او په ورته وخت کې هر دولتي چارواکی باید ستاسو سپارښتنې په نظر کې ونیسي او د عملي کولو هڅه یې وکړي.
 
نوموړي د خپلو خبرو په دوام کې له دیني عالمانو وغوښتل چې د خصوصي او دولتي پوهنتونونو په تدریس کې برخه واخلي.
 
د هېواد د لوړو زده کړو وزير وايي: د اسلامي کلتور د استادانو په توګه د ديني عالمانو د استخدام ازموينه نن پيل شوه او ديني عالمان کولاى شي د پوهنتونونو د نورو استادانو ترڅنګ په دندو پیل وکړي.
 
د هغه په ​​وينا، هغه ديني عالمان چې مدرسې او پوهنتوني زده کړې يې بشپړې کړي او علمي سند ولري کولاى شي په رقابتي ازموينه کې ګډون وکړي او هغه علماء چې شيخ الحديث وي او علمي سند نه لري، له امتحان پرته د تدريس دنده ورکول کېږي.
 
د اسلامي امارت د لوړو زده کړو وزارت سرپرست وایي: هغه استادان چې د دیني علومو په تدریس کې ښه فصاحت او بلاغت ولري او په عین حال کې علمي شهرت ولري، کولای شي له ګډون پرته د ساینسي زده کړو په برخه کې له موږ سره یوځای شي.
 
ښاغلي ندیم په خپلو وروستیو خبرو کې څرګنده کړه چې د دیني عالمانو د استخدام لپاره د ګمارنې بورډ موجود دی او د کانکور ازموینې په شفاف ډول ترسره کیږي.
 
د یادولو وړ ده چې د لوړو زده کړو سرپرست وزیر د دغه سفر په ترڅ کې د بلخ پوهنتون د لیلیې د پرانستلو سربیره د دولتي او خصوصي پوهنتونونو له محصلینو او استادانو سره جلا جلا ناستې درلودې.