د جوزجان والي: د مرستو د وېش بهیر عادلانه نه دی

افغان غږ خبری آژانس - مزارشریف: د جوزجان ولایت د سیمه ییزو چارواکو د معلوماتو پر بنسټ، د مرستو د ویش د بهیر د څیړلو ټیم چې د دغه ولایت د والي تر څارنې لاندې فعالیت کوي، موندلې ده چې یو لوی یو شمیر بې وزله کورنۍ د مرستو له ترلاسه کولو بې برخې دي.
 
د جوزجان والي محمد اسماعیل راسخ پرون (دوشنبه، عقرب ۱۶) د شمال او شمال ختیځ زون د مرستندویه بنسټونو له استازو سره په کتنه کې د دې موضوع په یادولو سره وویل: د بشري مرستو د وېش په بهیر کې عدالت نه دی تامین شوی. په مستحقو کورنیو اغیزه نه کوي.
 
هغه زیاته کړه: د بشردوستانه مرستو په بهیر کې باید عدالت او مساوات ته درناوی وشي، که نه د اوسني وضعیت دوام په هیڅ صورت د زغملو وړ نه دی.
 
د جوزجان د والي په وينا، وروستيو وچکاليو، د بشري مرستو د وېش په بهير کې د بې عدالتۍ زياتوالي خلک له سختو ستونزو سره مخ کړي او په همدې موخه يې په دغه ولايت کې د شفافيت د تامين لپاره يوه کمېټه جوړه کړې ده.
 
راسخ زياته کړه، چې په تېرو څو لسيزو کې په افغانستان کې د ډالرو باران وشو، خو د بې وزلۍ په له منځه وړلو کې یې کوم اغېز نه دی کړی او همدا لامل دی چې نن یوه مور د یوې ډوډۍ د ترلاسه کولو لپاره خپل ماشوم خرڅولو ته چمتو ده.
 
په همدې حال کې په شمال او شمال ختیځ زون کې د یونیسف دفتر مشرې کلارا دوبي وویل: د یونیسف دفتر هڅه کوي چې د اسلامي امارت سره په همغږۍ د مرستو د ویش په بهیر کې شفافیت تامین کړي ترڅو د دغه بهیر امنیت تامین شي.
 
په شمال زون کې د اوچا مشر نووا ریټینټو هم وویل چې دوی نن د بشري مرستو د همغږۍ، د اندېښنو او ستونزو د راټولولو او د بشري مرستو د پراخولو په موخه دغه ولایت ته سفر وکړ.
 
په شمال زون کې امر اوچا د بشري مرستو د وېش په بهیر کې پر شفافیت ټینګار وکړ او ویې ویل، دوی هڅه کوي داسې اسناد ترلاسه کړي چې د بشري مرستو په وېش کې د شفافیت نشتوالی ښيي.