په ایران کې د افغان کډوالو څلویښت کلن کوربه توب د ستایلو وړ دی موږ په بیلابیلو برخو کې د ایران همکاري غواړو

د کډوالو او راستنیدونکو چارو سرپرست وزیر خلیل الرحمن حقاني په کابل کې د ایران د اسلامي جمهوریت له سفیر سره په کتنه کې د افغان کډوالو د څلویښت کلن کوربه توب قدرداني وکړه او له ایران څخه یې د لا زیاتو همکاریو غوښتنه وکړه.

افغان غږ خبری آژانس - کابل: پرون پنجشنبه د سنبلې ۲۴ مه د کډوالو او راستنیدونکو چارو وزارت څخه په خپره شوې خبرپاڼه کې راغلي چې د اسلامي امارت د کډوالو او راستنیدونکو چارو سرپرست وزیر خلیل الرحمن حقاني په یوه غونډه کې په کابل کې د ایران د اسلامي جمهوریت له سفیر ښاغلي بهادر امینیان سره په کتنه کې هغه د دغه هېواد له څلویښتو کلونو راهیسې د افغان کډوالو د کوربه توب قدرداني وکړه او د دې همکاریو د دوام غوښتنه یې وکړه.

حقاني هیواد ته د کډوالو د راستنیدو د زمینې په برابرولو او د مهاجرت د مخنیوي په خاطر د ادغام او کاري چاپېریال په برابرولو کې د اسلامي امارت په جدي هلو ځلو ټینګار وکړ او د خدمتونو په وړاندې کولو کې یې د ایران له حکومت څخه د لا زیاتو همکاریو غوښتنه وکړه. مهاجرینو ته او په افغانستان کې دننه د هیواد اتباعو ته د کار چاپیریال برابرول.

د کډوالو دراستنولو چارو سرپرست وزير ډاډ ورکړ چې اسلامي امارت د نشه يي توکو کښت او قاچاق په کلکه منع کړی دی او په دې اړه د کابينې په غونډه کې هم پرېکړه شوې او هڅه کېږي چې دغه پديده صفر ته راټيټه شي.

د هغه په وينا، د نشه يي توکو د قاچاق د مخنيوي لپاره د ايران او افغانستان په ګډو پولو کې د پياوړي تجهيزاتو او د ځانګړو پوځي ځواکونو د استخدام اړتيا ده، چې د دواړو هېوادونو په ګډې همکارۍ سره شونې ده.

له بلې خوا بهادر امینیان؛ په کابل کې د ایران د اسلامي جمهوریت سفیر خبرداری ورکړ چې هره ورځ شاوخوا درې زره کسان ایران ته قاچاق کیږي او همدومره شمیر په ویزو ایران ته داخلیږي چې له دې سره په ایران کې د میشتو کډوالو شمیر زیاتیږي.

هغه د دواړو هیوادونو په سرحدونو کښې د انسان د قاچاق د مافیا او د نشه ایزو موادو د قاچاقبرانو د فعالیت په اړه اندیښنه څرګنده کړه او زیاته یې کړه: هغه کسان چې په غیر قانونی توګه ایران ته داخلیږی د انسانی قاچاق او د خدماتو د نشتوالی له ستونزو سره به مخامخ شی.

ښاغلي امینیان وویل چې د افغانانو د مهاجرت د کمولو د حل لاره په افغانستان کې دننه د کاري فرصتونو برابرول دي او اعلان یې وکړ چې د ایران حکومت چمتو دی چې په افغانستان کې دننه د کاري فرصتونو په رامنځته کولو کې له اسلامي امارت سره همکاري وکړي.

د يادونې وړ ده، چې تر دې وړاندې په کابل کې د ايران د اسلامي جمهوريت د سفارت چارواکو اعلان کړى و، چې له اسلامي امارت سره په اقتصادي، فرهنګي، روغتيايي او له ترهګرۍ سره د مبارزې په برخو کې همکاري کوي.