بلخ کې ۶۰۰ څخه ډیر د امنیتي ځواکونو فراغت

افغان غږ خبری آژانس - مزارشریف: محمد آصف وزیری؛ د بلخ د پولیسو ویاند نن چهارشنبه د سنبلې په ۲۳ مه، افغان غږ خبری آژانس ته وویل: د بلخ د پولیسو له اکاډمۍ څخه پرون ۶۳۰ تنه امنیتي سرتیري د پوځي او نظامی روزنیزو کورسونو له بشپړولو وروسته فارغ شول.
 
وزيري زياته کړه: په دې کورس کې فارغو شويو سرتېرو ته د پوستې جوړولو، ګزمې او له خلکو سره د چلند په اړه روزنه ورکړل شوې ده.
 
هغه زياته کړه، چې دغه ځواکونه د سرپل، فارياب، جوزجان، سمنګان او بلخ ولايتونو له امنيه قوماندانۍ څخه دي، چې تر رخصتېدو وروسته بېرته خپلو دندو ته ستانه شوي دي.
 
د بلخ د پولیسو اکاډمۍ د ۱۵۰۰ تنو د روزلو ظرفیت لري او د بلخ د پولیسو ویاند زیاته کړه چې دغه روزنیز مرکز د اسلامي امارت له واکمنۍ راهیسې ۳۰۰۰ سرتیري روزلي او ۸۰۰۰ نورو سرتیرو ته یې علمي سیمینارونه ورکړي دي.
 
دا په داسې حال کې ده، چې تېره ورځ په کندوز کې هم له ورته کورس څخه ٤٧٠ نور ځواکونه فارغ شول او په دواړو ولايتونو کې روزل شوي ځواکونه د تېر حکومت د پوليسو په يونيفورم کې و.
 
د بلخ د پوليسو وياند وايي، چې له دې ګوښه شويو ځواکونو د پخوانيو سرتېرو له يونيفورم څخه د روزنې لپاره کار اخيستى او ډېر ژر به د بلخ پوليسو ته ځانګړي يونيفورم ووېشل شي.