په جګړه ځپلو سیمو کې د ماشومانو د وضعیت په اړه د ملګرو ملتونو سازمان اندیښنه څرګنده کړه

افغان غږ خبری آژانس، په دغه راپور کې ویل شوي، چې په ۲۰۲۱ کال کې د ماشومانو پر وړاندې د جدي سرغړونو ۲۴ زره قضیې په ګوته شوي دي.
 
د دغه راپور له مخې په افغانستان، سوریه او یمن کې تر ۸ زرو ډېر ماشومان وژل شوي یا معیوب شوي دي.
 
د ماشومانو په وړاندې د جدي سرغړونو د نږدې ۲۴۰۰۰ قضیو څخه (په اوسط ډول هره ورځ ۲۵ قضیې)، له ۵۲۰۰څخه ډیرې قضیې د انجونو او له ۱۳۶۰۰څخه ډیرې قضیې په هلکانو پورې اړه لري.
 
د دغه راپور له مخې، ۱۶۰۰ ماشومان د ګڼو بریدونو قرباني شوي دي.
 
د ناچاودیدونکو مهماتو پاتې شوني، لاسي بمونه او ځمکني ماینونه د اتو زرو څخه د زیاتو ماشومانو د وژلو او معیوبیدو اصلي لاملونه دي.
 
دغه راز د دغه راپور له مخې اوس هم ماشومان د وسله والو ډلو له خوا استخدامېږي، چې شمېر یې تر ۶۳۰۰ تنو رسېږي.
 
هغه سیمې چې تر ټولو زیات ماشومان پکې په ۲۰۲۱ کال کې له سختو سرغړونو څخه اغیزمن شوي وو افغانستان، د کانګو دیموکراتیک جمهوریت، اسراییل، فلسطیني سیمې، سومالیا، سوریه او یمن دي.
 
د ماشومانو او وسله والو شخړو لپاره د ملګرو ملتونو د سرمنشي ځانګړې استازې ویرجینیا ګامبا په دې راپور کې ویلي چې په وسله والو شخړو کې د ماشومانو زیانمنونکي حالات په الفاظو نه شي بیانیدای.
 
اغلې ګمبا زیاته کړه چې هغه څوک چې له دې بحرانونو څخه ژوندي پاتې کیږي د خپل پاتې ژوند لپاره به د ژور فزیکي او احساساتي زخمونو څخه اغیزمن وي.
 
هغه وویل: "دا راپور د وسله والو شخړو په جریان کې د ماشومانو د ښه ساتنې لپاره د کار ګړندۍ کولو غږ دی او ډاډ ترلاسه کوي چې دوی ته د رغیدو او ودې لپاره ریښتیني فرصت ورکول کیږي."
 
په همدې حال کې، په ۲۰۲۱ کال کې، دوه ډوله جرمونه په چټکۍ سره زیاتوالی موندلی: تښتونې او جنسي تیري، چې د دې راپور له مخې دواړه په سلو کې شل فیصده زیات شوي.