د امریکايي ځواکونو قوماندان قطر کې له طالب استازو سره کتلي

د دې دفتر ویاند سهیل شاهین په یوه ټويټ کې ویلي، په دې کتنه کې د دواړو لورو ترمنځ د امریکا او طالبانو ترمنځ د سولې د هوکړې پر پلې کېدو او په دې برخه کې د "شویو سرغړونو په اړه تفصیلي" خبرې شوې دي.
ښاغلی شاهین وايي، په دې غونډه کې غوښتنه شوې چې په غیر جنګي سیمو کې دې د بریدونو او چاپو مخه ونیول شي.
نوموړي په ټویټ کې لیکلي: "په ناسته کې په هغو بریدونو او چاپو هم جدي خبرې وشوې چې په غیرجنګي سیمو کې ترسره شوې او د مخنیوي غوښتنه يې وشوه".
په افغانستان کې د امریکايي ځواکونو ویاند سوني لېګیټ رسنیو ته منلې چې ښاغلي میلر د طالبانو له استازو سره کتلي او وايي چې په دې لیدنه کې تاوتریخوالي د کمولو پر اړتیا خبرې شوې دي.