قریشي: ممکن د ایران او امریکا لانجه افغان سوله زیانمنه کړي

قریشي چې د پاکستان پارلمان کې یې خبرې کولې په افغانستان کې سوله د پاکستان او سیمې په ګټه بللې ده، خو ویلي یې دي چې د سولې دا نازک بهیر به د ایران او امریکا د ستونزو شدت له امله اغیزمن شي.
بله خوا د امریکا د ولسيمشرۍ ټاکنو ډیموکراټې نوماندې، تولسي ګابارډ خبرداری ورکړی چې د ایران او امریکا احتمالي جګړه به د افغانستان جګړه له یادونو وباسي.
میرمن ګابارډ فاکس نیوز خبري شبکې سره په خبرو کې په افغانستان او سیمه کې د ترهګرو ډلو شتون د اندیښنې وړ بللی او خبرداری یې ورکړی چې د افغانستان د جګړې هیرول به د سیمې او نړۍ هیوادونو لپاره ډیرې بلې پایلې له ځان سره ولري.
سره له دې چې افغان چارواکو د قاسم سلیماني له وژل کیدو وروسته ایران ته ډاډ ورکړی چې له افغان خاورې به د ګاونډیو هیوادونو پر ضد کار نه اخیستل کیږي، خو ایراني چارواکو ګواښ کړی چې د ایران او امریکا ترمنځ د جګړې پیلیدو سره به په سیمه کې د امریکا پوځي هډې په نښه کړي.