هرات کې ملی پولیسو وسله والو طالبانو یو جګپوړی ډلمشر ژوبل کړی دی

د افغانستان د کورنیو چارو وزارت په یوه بیان کې ویلي، چې د ملي پولیسو د ځانګړی قطعې ځواکونو تېره ورځ د هرات ولایت په پشتون زرغون ولسوالی کې ځانګړي عملیات ترسره کړي چې په ترڅ کې د یاد ولسوالی لپاره د طالبانو نومول شوی ولسوالی ملا نبي سخت ټپي شوی.
خببرپاڼه زیاتوي، چې په دغو عملیاتو کې څلور نور وسله والو ټپیان شوي او د ملا نبي څلور ساتوونکي وژل شوي دي.
د کورنیو چارو وزارت په وینا، د عملیاتو په ترڅ کې ۷ موټرسایکلونه او ۴ کړی ماینونه هم د امنیتي ځواکونو لاس ته ورغلي دي.
د وسله والو طالبانو په ګډون د دولت ضد وسله والې ډلې تر اوسه په دې اړه څه نه دي ویلي.
هرات د افغانستان په لودیدیځ کې په تیرو څو کلونو کې له نسبتا امنو ولایتونو څخه شمیرل کیده، خو په وروستیو کې یې امنیتي وضعیت نسبتا خراب شوی دی.
د هرات  په یو شمېر لرو پرتو سیمو کې اوس هم کله ناکله امنيتي پيښې رامنځته کیږي.