آصف صدیقي: د نفوسو د احوال ثبتولو ادارې یو شمېر کارکوونکي سپینې تذکرې خرڅوي

د دغې جرګې دوهم مرستيال محمد اصف صديقي، د سې شنبې په ورځ «۱۳۹۷ کال د غبرګولي ۲۲» ازادي راډيو ته وویل چې د نفوسو د احوال ثبتولو ادارې یو شمېر کار کوونکي سپینې تذکرې خرڅوي او د مشخصو نوماندانو په ګټه کار کوي.
نوموړي دغه‌شان وویل چې په دې وروستیو کې په ټولنیزو رسنیو په ځانګړي ډول پر فېس‌بوک پاڼو هم داسې عکسونه خپاره شوي چې د بهرنیو هېوادونو د نجونو او اکټرانو په نومونو تذکرې اخیستل شوي دي.
صدیقي وویل چې دا کار د انتخاباتو پر پروسې خلک بې‌باوره کولای شي. نوموړي زیاته کړه:
"زما په اند اساسي ستونزه خپله د نفوسو د احوال د ثبت په اداره کې ده، همدغه د دوی کار کوونکي دي چې سپینې تذکرې هم خرڅوي او د کاندیدانو په ګټه کار هم کوي، اوس په فېس‌بوکونو کې هم داسې عکسونه خپاره شوي چې د ځينو هندي او ایراني نجونو په عکسونو تذکرې اخیستل شوي، حتی زه په جریان کې یم چې یو شمېر ولایتونو کې د کاندیدانو په کورونو کې تذکرې وېشل کېږي او هېڅ ډول څارنه نه‌کېږي."
نوموړي وویل چې دا درغلۍ خلکو ته د منلو وړ نه‌دي او حکومت‌یې باید مخه ونیسي.
دا په داسې حال کې ده چې تر دې وړاندې هم د افغانستان د ملي شورا یو شمېر غړو او د افغانستان د انتخاباتو د څار یو شمېر بنسټونو انتقادونه کړي چې د تذکرو د وېش په ځینو دفترونو کې خلکو ته جعلي تذکرې وېشل شوې دي.