افغان غږ خبری آژانس - کابل: په چین کې د اسلامي امارت د سفارت مطبوعاتي دفتر د یوې خبرپاڼې په خپرولو سره ویلي چې په چین کې د اسلامي امارت سفیر مولوي بلال کریمي د نړیوالو اړیکو له مرستیال شان مینګ سره وکتل.
په دې کتنه کې شان مينګ وويل له افغانستان سره به د سالم ژوند، سمارټ موټرونو، پاکې انرژۍ، کرنې او د ډيجيټل سيستم د ميکانيزم په برخو کې د همکارۍ او متقابل عمل اوسنی بهير پراخ شي.
مينګ زياته کړه چې هغه په پام کې لري چې د روان کال په نومبر مياشت کې شاوخوا ٩٠ هېوادونو ته بلنه ورکړي؛ په بیجینګ کې د افغانستان سفارت او افغان سوداګرو ته بلنه ورکړه چې په دغو سیمو کې په یوه نندارتون کې ګډون وکړي.
له بلې خوا مولوي بلال کریمي وویل چې اوس په افغانستان کې د پانګونې ښه فرصتونه شته او له سوداګرو او پانګوالو د اسلامي امارت ملاتړ د پخوا په پرتله زیات شوی دی.
کریمي زیاته کړه، اسلامي امارت د اقتصادي او سوداګریزو همکاریو د پیاوړتیا او پراختیا لپاره اړینو پرمختګونو ته چمتو دی.
باید وویل شي چې چین په وروستیو کلونو کې د افغانستان یو له مهمو اقتصادي او سوداګریزو شریکانو څخه دی.