افغان غږ خبری آژانس: د دوغارون د آزادې سوداګرۍ د صنایعو اجراییوي رئیس محسن پور احمدي وايي، د دوغارون ځمکنۍ لار د افغانستان او ایران تر منځ تر ټولو مهمه اقتصادي دروازه او د منځنۍ اسیا له یو شمېر هېوادونو سره د ارتباطاتو د پله حیثیت لري.
احمدي وويل: دغه سيمه د افغانستان له لارې د نړۍ په بازارونو کې د شتون لپاره يو فرصت بلل کيداى شي او دغه موضوع په دې سرحدي سيمه کې د کار په لټه کې ځوانانو ته د دايمي کار موندنې په برخه کې ستر رول لوبوي.
د ایرنا د خبر له مخې، د دوغارون د آزادې سوداګرۍ او صنایعو د سازمان اجراییوي مشر دې ته په اشارې سره چې افغانستان د ایراني توکو یو مصرف کونکی هیواد دی، په دوام وویل: له افغانستان سره د دوغارون نږدېوالی کولای شي په مختلفو برخو کښې د دواړو هیوادونو د اړیکو کچه زیاته کړي.
احمدي په وینا، اقتصادي فرصتونه د ایران لپاره زرین ظرفیت ګڼل کیږي او په مختلفو برخو کې د هغه پیاوړتیا په ملي کچه د ټولو چارواکو هماهنګۍ ته اړتیا لري او په عین حال کې باید د اقتصاد په پراختیا کې غفلت ونه کړو.
هغه څرګنده کړه: د دوغارون د آزادې سیمې لومړی فاز چې په ۲۵۴ هکتاره ځمکه کښې پلان شوی او په دغه اقتصادی مرکز کښې د پانګوالو د شتون او پانګونې لپاره زمینه برابره شوې ده اوس د ایران او بهرنیانو منلو او ملاتړ ته چمتو دی.
د دوغارون د آزادې سوداګریزې-صنعتي حوزې د ادارې اجرایوي رییس وویل: د اتو زرو او اوه سوه هکتاره مساحت لپاره د دوغارون د آزادې سوداګریزې-صنعتي حوزې د جوړولو پلان په پام کې نیول شوی چې د ساختماني چارو د پیل د اسانتیا او ګړندیتوب په خاطر د لومړي پړاو کې 254 هکتار په کچه پلي کیږي.
احمدي زیاته کړه: د دوغارون سرحدي ګمرک چې څه دپاسه ۱۱۰ کاله لرغونتوب لري، د ایران له پنځو سترو اقتصادي او فعالو ګمرکونو څخه دی او اوسمهال د ایران او افغانستان د پولو تر منځ له زرو څخه زیات ایراني او افغاني لارۍ تګ راتګ کوي.