قطر کې د افغان دولت پلاوی: هیله‌من یو وروستۍ پرېکړې ته ورسېږو

دا خبره د سولې په چارو کې د دولت د وزارت ویاندې ناجیه انوري ازادي راډیو ته وکړه.
هغې زیاته کړه: "د هغو نظریاتو او انتخابونو په اړه چې د افغانستان اسلامي جمهوریت وړاندیز کړی ښایي مقابل لوری داخلي بحثونه ولري. د افغانستان اسلامي جمهوریت مذاکراتي پلاوی پوره هڅه کوي او هیله‌من دی چې په راتلونکو څو ورځو کې په یوه روښانه او سمه لار نقشه وروستۍ پرېکړې ته ورسېږي."
اغلې انوري وویل د افغان دولت پلاوی هم له بېلابېلو خواوو سره په دې وروستیو کې خپلې سلا مشورې زیاتې کړي.
د افغانستان دولت او طالبانو ترمنځ د سولې د خبرو له پيله یوه میاشت ووتله، خو لا هم د خبرو لپاره د طرزالعمل په جوړولو لانجه نه‌ده هواره شوې.