د امریکا او طالبانو ترمنځ د سولې شوې هوکړې له مخې، یادې ډلې ژمنه کړې چې له القاعدې ډلې سره به خپلې اړیکې پرې کوي.
د پنټاګون د څېړنې دفتر سرپرست، شان اودونل د دغه هېواد کانګرس ته راپور کې ليکلي دي:«ملګرو ملتونو او د امریکا پوځ مرکزي قومندانۍ، دواړو راپور ورکړی چې طالبان د القاعدې ډلې ملاتړ ته دوام ورکوي او ان پر افغان ځواکونو د بریدونو په تړاو سره همغږي کوي.»
طالبانو دغه راپور رد کړی دی.
مخکې له دې د ملګرو ملتونو امنیت شورا ویلي وو چې لا هم طالبان له القاعدې ډلې سره اړیکه لري.
د یاد بنسټ راپور کې راغلي وو چې القاعده له امریکا متحده ایالاتو سره د سولې خبرو ته د طالب مشرانو له پامه په اندېښنه کې دي.
همداراز د روان کال چنګاښ میاشت کې د امریکا متحده ایالاتو دفاع وزارت د افغانستان امنیتي حالت په تړاو راپور کې چې د دغه هېواد کانګرس ته یې استولی وو، طالبان یې په کې له القاعدې دلې سره د اړیکو په ساتلو تورن کړل.
راپور کې راغلي وو چې د سیمې ترهګرې ډلې او القاعده له طالبانو سره نېږدې اړیکې لري او پر امریکايي او د واشنګټن همکارو ځواکونو باندې بریدونو کې "اوږدمهاله ګټې" لري.