متقاعد امریکایي جنرال: اوکرایني ځواکونه په کرسک کې محاصره شوي

افغان غږ خبری آژانس: د امریکا د پوځ متقاعد جنرال لارنس ویلکرسن په خپل یوټیوب چینل ډیالوګ ورکس کې ویلي چې روسي ځواکونو د کرسک په سیمه کې اوکرایني سرتیري محاصره کړي دي.

 

هغه وويل: "اوکرايني ځواکونه مړه وشمېرئ، دوی به مړه شي، دوی حتی اوبه او خواړو ته لاس رسی نه لري، دوی محاصره شوي دي."

 

د روسیې د دفاع وزارت د مرکزي کورسک سیمې د وروستي وضعیت په اړه په یوه راپور کې ویلي چې د شمالي برخې یونټ د بورکي، کورینوا، کریمیا او مالیا لوکینیا ښارګوټو ته نږدې د اوکراین د یرغلګرو ډلو اته بریدونه رد کړي دي. پنځه اوکرایني سرتیري هم په کرسک کې تسلیم شول.

 

د دغه وزارت په وینا، په تېرو ۲۴ ساعتونو کې د کرسک په محور کې د اوکراین پوځ ۳۸۰ پوځیان او ۳۰ زغروال ګاډی هم له لاسه ورکړی دی.

 

په همدې حال کې د سي آی اې مرستیال ډېوېډ کوهن ویلي، اوکرایني ځواکونه غواړي چې د روسیې په کرسک سیمه کې هغه سیمې ونیسي چې د «یو څه مودې لپاره» یې په خپل برید کې نیولي دي او د روسیې هر ډول برید به سخته جګړه وي.

 

دا څرګندونې وروسته له هغه کېږي چې کرملېن د اوکراین د ولسمشر ولادیمیر زیلینسکي د جګړې د پای ته رسولو د پلان خبرې رد کړې او ویلي یې دي چې روسیه به په اوکراین کې خپلو ځانګړو پوځي عملیاتو ته دوام ورکړي.

 

کوهن په یوه لنډه وینا کې وویل چې د روسیې ولسمشر ولادیمیر پوتین باید د روسیې د خاورې د لاسه ورکولو په اړه د خپلې ټولنې د اختلافي غږونو سره مقابله وکړي.

 

اوکراين دوه اونۍ مخکې په کرسک سيمه کې د روسيې پولې ته څېرمه وتوانېدل چې د سيمې ځينې برخې ونيسي.