فیروز: په افغانستان کې د کرونا ضد محافظتي توکو تولیدي فابریکه جوړوو

نوموړي زیاته کړه«که څه هم تراوسه مو سل زره محافظتي کیټونه وارد کړي، لیکن بسنه نه کوي له همدې امله هڅه کوو د کورنیو تولید کوونکو په مرسته د سیمې په معیارونو برابره یوه تولیدي فابریکه جوړه کړو، یاده فابریکه به درې ورځې وروسته په کار پیل وکړی او هره ورځ به د ۱۰ زره جوړو محافظتي کیټونو او ماسکونو د جوړلو وړتیا ولري.»
ښاغلي فیروز وویل: کوم روغتیايي وسایل چې په افغانستان کې تولیدیږي، ډاکټرانو او هغو کسانو ته به ورکول کیږي چې په کرونا رنځ اخته کسانو سره یې اړیکې وي.
د عامې روغتیا وزیر ډاډ څرګند کړ، چې ډیر ژر به په کور دننه د مکروب ضد مایع(ایټانول) چې د لاسونو او ځایونو پاکولو کې ورڅخه ګټه اخیستل کیږي د تولید کار هم پیل شي.
له کرونا وایرس سره د مبارزې په برخه کې د عامې روغتیا وزارت هڅې په داسې مهال ګړندۍ کیږي، چې د رسمي شمېرو ترمخه تردې دمه په هېواد کې په کرونا وایرس د اخته کسانو شمېر ۴۸۴ تنو ته رسیدلی، په دغه ډله کې ۳۲ تنه بیرته رغیدلي او ۱۵ تنو نورو بیا خپل ژوند له لاسه ورکړی دی.