افغانستان کې ولسمشریز او ولایتی شورا ټاکڼو نیټه نهایی شوي

د انتخاباتو د خپلواک کمېسیون ویاند سید حفیظ‌الله هاشمي وايي، د دې کمېسیون د سې شنبې د ورځې په غونډه کې د ولسمشرۍ د راتلونکو انتخاباتو نېټه نهايي شوه او پرېکړه وشوه چې د راتلونکې هجري لمریز کال د وري یا حمل میاشتې په ۳۱مه نېټه به د ولسمشرۍ او ولایتي شوراګانو انتخابات په یوځای ترسره شي.
د ولایتي شوراګانو پخواني انتخابات هم د ولسمشرۍ له تېرو انتخاباتو سره یوځای ترسره شوي وو.
ښاغلي هاشمي په دی اړه وویل:
"کمېسیون نن د رأیو په اکثریت پرېکړه وکړه چې د ولسمشرۍ او ولایتي شوراګانو انتخابات به د راتلونکي ۱۳۹۸ هجري شمسي کال په پسرلي کې د وري د میاشتې په ۳۱مه نېټه ترسره شي."
د اوسنیو ولایتي شوراګانو د کار دوره د روان هجري لمریز کال په عقرب میاشت کې پوره کېږي چې باید لپاره‌یې د ولسمشرۍ تر انتخاباتو مخکې انتخابات شوی وی.
خو د انتخاباتو د خپلواک کمېسیون ویاند سید حفیظ‌الله هاشمي وايي، تخنیکي او مالي امکاناتو ته په کتو کمېسیون پرېکړه کړې چې د ولایتي شوراګانو انتخابات هم د ولسمشرۍ له انتخاباتو سره په یو وخت ترسره کړي.

ښاغلي هاشمي وویل چې په دې اړه پرېکړه د ملي امنیت کمېټې ته راجع شوې چې د انتخاباتو د قانون له مخې کولای شي د څلور میاشتو لپاره د ولسوالیو د شوراګانو د انتخاباتو د ځنډولو پرېکړه وکړي.
انتخابات له اوس څخه شااوخوا اته نیمې میاشتې وروسته ترسره کېږي.
د ولسمشرۍ د انتخاباتو لپاره د اعلان شوې نېټې پر بنسټ دا انتخابات له اوس څخه شااوخوا اته نیمې میاشتې وروسته ترسره کېږي.