له افغان حکومت سره د اړیکو پر پراختیا د اسلامي همکاریو د سازمان او بریتانیا ټینګار

افغان غږ خبری آژانس - کابل: د اسلامي همکاریو سازمان په یوه خبرپاڼه کې ویلي، چې د افغانستان په چارو کې د دغه سازمان ځانګړي استازي طارق علي بخت، د افغانستان په چارو کې د بریتانیا له ځانګړي استازي انډي مک کوبري سره وکتل.

په دې کتنه کې چې په جده ښار کې د اسلامي همکاريو د سازمان په مقر کې ترسره شوه، په دوحه کې د ملګرو ملتونو سازمان د افغانستان په چارو کې د افغانستان د ځانګړي استازي د وروستۍ غونډې پر مهمو موضوعاتو تمرکز وشو.

په خبرپاڼه کې راغلي: "دواړو لورو د اسلامي امارت له چارواکو سره د اړیکو پر پراخولو ټینګار وکړ، تر څو د اقتصادي، بشري او بشري حقونو د لومړیتوبونو په ګډون له ګڼو ننګونو سره چې هېواد او خلک ورسره مخامخ دي، په اغېزمنه توګه حل شي."

د خبرپاڼې له مخې، په دې ناسته کې اقتصادي بې ثباتي، د بشري ناورین مخ په زیاتیدو او د بشري حقونو په اړه اندیښنې د بیړنیو لومړیتوبونو په توګه مطرح شوې چې همغږي نړیوالو اقداماتو ته اړتیا لري.