افغان غږ خبری آژانس: د روغتیا د نړیوال سازمان ویاندې مارګریت هاریس الجزیرې ته وویل، چې په غزه کې د پولیو د ناروغۍ لومړۍ نښې څرګندې شوې دي.
هغه وویل چې د روغتیا نړیوال سازمان د واکسینونو او درملو د ننوتلو لپاره چې د انساني ژوند لپاره حیاتي دي د رفح لارې د ژر خلاصیدو غوښتنه کوي.
مارګوریت هاریس دا هم وویل چې د پولیو په وړاندې د واکسین کولو پراخه کمپاین پیل کولو ته بیړنۍ اړتیا ده.
په عین حال کې، د غزې د عامې روغتیا وزارت نن اعلان وکړ چې په غزه کې د پولیو ویروس لومړۍ پیښه؛ په دې ناروغۍ اخته کس د "دیر البلاح" ښار یو لس میاشتنی ماشوم دی چې تر اوسه یې د پولیو ضد واکسین نه دی اخیستی.
پولیو یو ډیر ساري ویروس دی چې کولی شي په عصبي سیسټم برید وکړي او د فلج لامل شي، او دا په عمده توګه د 5 کلونو څخه کم عمر لرونکي ماشومان اغیزمنوي.
د اسد په دوهمه ورځ په غزه او لویدیځه غاړه کې د روغتیا د نړیوال سازمان (WHO) د روغتیایی بیړنیو ټیمونو مشر "ایادیل صبرکوف" وویل چې د ناوړه روغتیایی وضعیت او د څښاک د اوبو د ککړتیا له امله د په غزه کې د پولیو د ویروس د خپریدو خطر ډیر دی.
هغه وویل چې د واکسین څخه ترلاسه شوی د پولیو ویروس ډول 2 د فاضله موادو د چاپیریال له نمونو څخه جلا شوی او په ټوله غزه کې خپریږي.
د پوليو د ويروس د لومړۍ پېښې رسمي ثبت په داسې حال کې کېږي چې د اسرائيلو پوځ درې اوونۍ مخکې ادعا وکړه چې د غزې په تړانګه کې د پوليو د وايروس د پاتې شونو له موندلو وروسته به خپلو پوځيانو ته د پوليو واکسين ورکړي.
په دې اړه ایادل سپارکوف خبریالانو ته وویل، دی نه یوازې د پولیو د خپرېدو په اړه اندېښمن دی، بلکې په غزه کې روان وضعیت د ډېرو ویروسونو د خپرېدو لامل هم دی.