په افغانستان کې د کوکنارو کښت پای ته رسېدلی دی/ یو مناسب بدیل باید چمتو شي

افغان غږ خبری آژانس - کابل: د کرنې، اوبولګولو او مالدارۍ وزارت مطبوعاتي دفتر د یوې خبرپاڼې په خپرولو سره ویلي چې د دغه وزارت مرستیال مولوي صدر اعظم عثماني د ټولګټو د دوامدارې پراختیا پروژې له مسوولینو سره وکتل.

په دې کتنه کې دکرنې وزارت سرپرست دپرمختيايي پروژو په تطبيق کې په صداقت او صداقت ټينګار وکړ .

نوموړي د دې پروژې د فعاليتونو د ستاينې په ترڅ کې د شته ستونزو د حل او خلکو ته د خدمتونو وړاندې کولو اهميت ته اشاره وکړه او ويې ويل، چې د کوکنارو کښت پای ته رسېدلی او د دې لپاره بايد يو مناسب بديل رامنځته شي، ترڅو د خلکو ژوند زيانمن نه شي.

په دې غونډه کې د دوامدارې ټولنې د پراختیا پروژې مسوولینو هم د ټولنې د پراختیا او د کرنیزو توکو د وېش په برخه کې د خپلو فعالیتونو راپور وړاندې کړ او په یادو برخو کې یې د همکارۍ ډاډ ورکړ.

د يادونې وړ ده، چې دولت په هېواد کې د نشه يي توکو په ځانګړې توګه د کوکنارو د کښت پر وړاندې جدي مبارزه پيل کړې او په دې وروستيو کې په بدخشان کې ١٣٠ کروندګر د کوکنارو د کښت په جرم نيول شوي دي.