د پاکستان سفیر: هند په تېرو دوو لسیزو کې په افغانستان کې ډېر منفي رول لوبولی دی

افغان غږ خبری آژانس: منصور احمد خان؛ په کابل کې د پاکستان سفیر وايي، هند په تېرو څو لسیزو کې په افغانستان کې "ډېر منفي" رول لوبولی دی.
 
نوموړي له یوې پاکستاني رسنۍ سره په مرکه کې ادعا کړې، چې په تېرو دوو لسیزو کې په افغانستان کې فعالې ترهګرې ډلې د هند له خوا تمویلېدي.
 
د پاکستان سفیر زیاته کړه: "هغوی (ترهګرو) د سرحدي سیمو په شاوخوا کې خوندي پټنځایونه موندلي او د افغانستان خاوره یې د پاکستان، پخوانۍ قبایلي سیمې او بلوچستان ایالت د بې ثباته کولو لپاره په ترهګریزو فعالیتونو کې کارولې."
 
دغه پاکستاني چارواکي ویلي، چې هند په تېرو څو لسیزو کې د افغانستان په هغو سیمو کې پانګونه کړې، چې هڅه کوي د ترهګریزو فعالیتونو له لارې پاکستان بې ثباته کړي.
 
د پاکستان سفیر زیاته کړه چې د اسلامي امارت حکومت ډاډ ورکړی چې د افغانستان خاوره به د پاکستان په ګډون د بل هیواد پر ضد نه کارول کیږي.
 
نوموړي د خپلو خبرو په یوه برخه کې له نړیوالې ټولنې وغوښتل چې له اسلامي امارت سره د پراخو تعاملاتو له لارې خپل ملاتړ پراخ کړي ترڅو د اقتصادي سقوط د خطرونو مخه ونیول شي.
 
منصور احمد خان د افغانستان د مرکزي بانک د زیرمو خلاصول او د مالي مرستو دوام د افغانستان د «بې وزلو خلکو» د دردونو د کمولو لپاره حیاتي ګڼلی دی.
 
هغه په ​​دوام وویل: « مهمه داده چې د افغانستان د خلکو په وړاندې له اقتصادي بندیزونو نه کار واخلو. "د افغانستان بهرنۍ زېرمې باید افغانستان ته وسپارل شي چې د خلکو په ګټه او سوکالۍ کې ولګول شي."
 
منصور احمد خان له اسلامي امارت سره د ملګرو ملتونو او د افغانستان د ګاونډیو هېوادونو د ملاتړ غوښتنه وکړه.
 
په همدې حال کې هند یو له هغو هېوادونو څخه دی چې له افغانستان سره د غنمو مرسته کوي او په وروستیو کلونو کې یې لسګونه زره ټنه غنم د چابهار بندر له لارې افغانستان ته استولي دي.
 
دا په داسې حال کې ده چې پاکستان په تېرو دوو لسیزو کې د اسلامي امارت یو له اصلي ملاتړو څخه بلل کېده.