د کندهار سیمه‎ییز چارواکي د اوزګارتیا کچې له ډېروالي اندېښنه لري

د کندهار ولایت د کار او ټولنیزو چارو رئیس وایي چې ورځ تر بلې د اوزګارو کسانو شمېر زیاتیږي. هغه د بې‎کاریو زیاتوالي لامل نا امنۍ، پانګو تېښته او د تولیدي شرکتونو نشتون بولي.
د کندهار ولایت د کار او ټولنیزو چارو رئیس،نظرعلی قاطع وايي: «په کندهار کې بې‎کاري او فقر زیات دی او ماشومان د یوې مړۍ ډوډۍ لپاره درانه کارونه کوي چې د غه کار زموږ اندېښنه زیاته کړې ده او موږ هڅه کوو چې دغې ستونزې ته د حل لار پیدا کړو.»
په همدې حال کې، د کندهار ولایت اوسیدونکي بیکاري له خپلو لویو ستونزو په توګه یادوي.
په کندهار کې داسې ماشومان شته چې درانه کارونه ترسره کوي. دغه ماشومان وايي چې اړ دي کار وکړي تر څو تر ماښامه خپلې کورنۍ ته یوه مړۍ ډوډۍ پیدا کړي.
یو شمېر ماشومان د کار ترڅنګ زده‎کړې هم کوي خو یو شمېر نور یې بیا د زده‎کړې زمینې نه برابرېدو له امله نشي کولی چې درس اوایي او دوی له دولت څخه غواړي چې ورته د زده‎کړو زمینه برابره کړي.
په کندهار کې پر کار بوخت ماشوم، سید ګل وایي:«زه په خپله کورنۍ ته ډوډۍ تیاروم او له سهار څخه تر ماښامه په دغه مسټري‎خونه کې کار کوم تر څو خپلې کورنۍ ته یوه مړۍ ډوډ‌ۍ پیدا کړم.»
احمد الله بل ماشوم دی چې کار کوي، دی وایي:«زه هیله لرم چې زده‎کړې وکړم، خو اړ یم چې خپلې کورنۍ ته د مرستې په موخه کار وکړم؛ مکتب ته نشم تلی. خدای دې زموږ هېواد آرامه کړي تر څو زما په شان ماشومان خپلو هيلو ته ورسېږي.»
د کندهار ولایت اوسیدونکي نا امنۍ، د پانګو تیښته، د حکومت دننه خپل منځي اختلافات او سیاسي اړو دوړ د وزګاري اصلي لامل بولي او له حکومت څخه غواړي چې په دې برخه کې جدي پام‎لرنه وکړي.