رئیس جمهور دوشنبه به تاجیکستان می رود

رئیس جمهور کرزی روز دوشنبه هفته جاری به منظور گسترش روابط میان کابل ودوشنبه عازم تاجیکستان می شود.
به گزارش خبرگزارب آوا، وزارت خارجه تاجیکستان در بیانیه ای اعلام کرد : حامد کرزی رئیس جمهورافغانستان و امام علی رحمان رییس جمهور تاجیکستان به منظور تقویت همکاری های دوجانبه و امنیت منطقه ، دوشنبه هفته جاری دردوشنبه پایتخت کشور تاجیکستان با یکدیگر گفتگو می کنند.
کرزی قصد دارد دراین سفر چندین سند در راستای همکاری های دوجانبه با رییس جمهور تاجیکستان به امضا برساند.
تاجیکستان درجریان سال های گذشته از طرق مختلف افغانستان را حمایت کرده وبیش از ۱۵۰۰ کیلومتر مرزمشترک با افغانستان دارد.
رئیس جمهورکرزی، درشرایطی تصمیم سفربه تاجیکستان را گرفته است که پارلمان کشور تاجیکستان در دوم اکتوبر ۲۰۱۳ طرحی را تصویب کرد که براساس آن، سربازان روسی می توانند تاسال ۲۰۲۴ میلادی امنیت مرزهای مشترک دوشنبه وکابل را بر عهده بگیرند.
به گزارش آوا به نقل از العربیه، مقامات تاجیکستان همواره گفته اند، بعد از خروج نیروهای خارجی از افغانستان درسال ۲۰۱۴ میلادی، ناآرامی ها از افغانستان به کشور تاجیکستان نیز سرایت خواهد کرد.
این در حالی است که مقامات ناتو می گویند، با خارج شدن سربازان خارجی از افغانستان تا پایان سال ۲۰۱۴ میلادی، اردوی ملی توانایی به دست گرفتن امنیت افغانستان را دارا می باشند، وسربازان ناتو بعد ازسال ۲۰۱۴ میلادی به آموزش اردوی ملی افغانستان می پردازند.