وزارت اقتصاد: تلاش برای راه‌اندازی پروژه‌های نیمه‌کاره جریان دارد

خبرگزاری صدای افغان (آوا) ـ کابل: عبداللطیف نظری، معین مسلکی وزارت اقتصاد، در رشته توییتی نگاشته که یافتن بودجه برای پروژه‌های نیمه‌کاره و ناتمام، یکی از اولویت‌های این وزارت است.
 
به گفته نظری، حضور فعال در نشست‌های بین‌المللی، فرصت رشد سریع اقتصادی، کاهش فقر و رفاه عامه را در میان‌مدت فراهم می‌سازد.
 
وی افزوده است؛ دیپلوماسی اقتصادی ما، در راستای اشتراک هدفمند در نشست‌های بین‌المللی طراحی شده است.
 
نظری در حالی از رشد سریع اقتصادی و راه‌اندازی پروژه‌های نیمه‌کاره در میان‌مدت سخن می‌گوید که سیستم اقتصادی کشور هنوز فعال نشده است، فعالیت بانکی مختل، پشتوانه پولی افغانستان مسدود و فقر و بیکاری همچنان بیداد می‌کند.