اشرف غنی از رئیس جمهور تاجیکستان دعوت کرد که به کابل سفر کند

محمد اشرف غنی رئیس‌جمهوری اسلامی افغانستان در یک تماس تلفنی از "امام علی رحمان" رئیس جمهور تاجیکستان دعوت کرد تا به افغانستان سفر نماید.

به گزارش خبرگزاری آوا، رئیس جمهوری کشورمان عصر روز جمعه (۱۵ ثور) در یک تماس تلفنی با "امام‌علی رحمان" رئیس‌جمهوری تاجیکستان صحبت کرد.

سران دوکشور روی موضوعات مورد علاقه بحث و تبادل نظر نمودند و آقای غنی از همکاری‌های تاجیکستان به‌ویژه در زمینۀ مداوای مجروحین حادثه اخیر، تشکر کرد.

براساس معلومات ارگ ریاست جمهوری، آقای غنی از رئیس‌جمهوری تاجیکستان دعوت کرد که از افغانستان دیدن نماید تا گام‌های بهتر در عرصۀ تقویت همکاری‌ها به خصوص در عرصه‌های امنیتی و اقتصادی برداشته‌شود.

در همین حال رئيس جمهوری تاجیکستان از دعوت رئیس‌جمهورکشورمان استقبال کرده و گفته است که کشورش آماده است درهمکاری با افغانستان در بهبود وضعیت امنیتی و مبارزه با تروریزم مشترکاً کار کند.

همچنین سران دوکشور بر مبارزه مشترک علیه تروریزم تأکید کرده اند.