د هېواد په شمالي ولایتونو کې د کتاب لوستنې اونۍ لمانځل

افغان غږ خبری آژانس - مزارشریف: د جوزجان ولایت د اطلاعاتو او کلتور رییس مولوی سیف الدین معتصم وویل: سره له دې چې د جوزجان ولایت په شبرغان ښار او ولسوالیو کې ګڼ کتابتونونه جوړ او فعالیت لری، خو بسنه نه کوی او موږ هوډ لرو چې کتابتونونه جوړ کړو چې د عامو خلکو او په ځانګړې توګه ځوانانو ته د لوستلو چاپیریال برابر کړي.

هغه زیاته کړه: "د کتاب مطالعه او لوستل په شخصي او ټولنیز ژوند کې خورا مهم دي ځکه چې دا د انسان د علمي ظرفیت د ودې لامل کیږي او ځوانان باید د خپل فارغ وخت ډیره برخه د کتابونو لوستلو سره تیره کړي."

دغه راز د بلخ ولايت د اطلاعاتو او کلتور رياست د هنر او کلتور مدیر عطاء محمد ساهو په مزارشريف ښار کې د کتاب لوستنې د اوونۍ د نمانځنې پر مهال وويل، چې د کتاب او قران کريم يو ستر نندارتون په مزارشريف ښار کې پرانيستل شو. 

هغه زياته کړه: د نويو معلوماتو د ترلاسه کولو لپاره د ځوانانو لپاره د کتاب لوستلو ته اړتيا ده او لوستل ډېر ارزښت لري.

له بلې خوا د فارياب ولايت مرستيال مولوي حميدالله ارشاد په دغه ولايت کې د کتاب د اوونۍ د نمانځنې په مراسمو کې وويل: د کتاب لوستل ډېر خوږ او خوندور دي او هېواد د پرمختګ لامل کېږي، نو لازمه ده ټول ځوانان باید د لوستلو سره علاقه ولري.

له بلې خوا د سمنګان د کتابتون عمومي مشر جان محمد امیري وايي چې لوستل د ځوانانو او تنکيو ځوانانو د استعدادونو په وده کې ډېر ګټور دي.

له بلې خوا د سرپل ولایت د اطلاعاتو او کلتور ریاست چارواکي په دغه ولایت کې د کتاب لوستلو اونۍ د نمانځلو خبر ورکوي.

په همدې حال کې د هېواد وتلی شاعر او لیکوال صالح محمد خلیق وايي، کتاب او کتاب لوستل د هېواد د تمدن او پرمختګ لامل کېږي، نو هر څوک باید کتاب ولولي او خپل علمي ظرفیت لوړ کړي.

د يادونې وړ ده، چې د هېواد د شمالي ولايتونو اوسېدونکو د کتاب او لوستلو اونۍ د نمانځلو په مناسبت د کتابونو د نندارتونونو د جوړېدو هرکلى وکړ او د دغه ډول پروګرامونو د دوام غوښتنه يې وکړه.