د میدان وردګ ولایت چارواکو د ۸۰۰ زره امریکایي ډالرو په لګښت د یوه دارالایتام د جوړېدو د پیل خبر ورکړی، چې د ۸۰۰ یتیمانو ظرفیت لري.

آوا - کابل: د میدان وردګ ولایت مقام مطبوعاتي دفتر وايي، چې په دغه ولایت کې د ۸۰۰ زره ډالرو په ارزښت د یوه عصري دارالایتام د بنسټ ډبره د دې ادارې د عمومي رئیس او والي په حضور کې کېښودل شوه. 

د دې خبرپاڼې له مخې، دغه یتیم خانه به د دولتي چارواکو او پانګوالو په مالي مرسته په اته جریبه ځمکه کې جوړه شي، چې په یو وخت کې به د ۸۰۰ یتیمانو ظرفیت ولري.

دا په داسې حال کې ده چې د شهیدانو او معلولینو چارو وزارت چارواکو ملت ته د حکومت د حساب ورکونې په پروګرام کې د هېواد پر څه باندې ۶۰۰ زره یتیمانو او معلولینو باندې د څه باندې ۱۵،۵ میلیارد افغانیو د نغدو پیسو د وېش اعلان کړی او ویلي یې دي تېر کال چې سرپرست حکومت له ټولو معلولینو، یتیمانو او بې کوره ښځو سره یو شان چلند کوي.