آوا: د سعودي عربستان سرچینو د جمعې په ماښام خبر ورکړ چې د مدینې منورې په مختلفو سیمو کې د سخت باران له امله په دغه سیمه کې بې ساري سیلابونه راوتلي دي.

 

په سعودي رسنیو کې خپاره شوي عکسونه په ښکاره ډول هغه موټرونه ښیې چې د سیلاب له امله له یوې کوڅې بلې ته روان دي.

 

د سعودي د هوا پېژندونکي عبدالله الحربي د X ټولنیزې شبکې (پخواني ټویټر) کې په خپل کارونکي حساب کې لیکلي: "د مدینې سیلاب تاریخي دی."

 

د سعودي عربستان د هوا پېژندنې ادارې د جمعې په ورځ په یوه بیان کې په مدینه منوره کې د سختو بارانونو او سیلابونو وړاندوینه کړې ده.

 

سعودي سرچینې وايي، د دغه هېواد یو شمېر اتباع له سېلاب وروسته بند پاتې دي او د ژغورنې ځواکونو مرستې ته په تمه دي.

 

د سعودي عربستان د هوا پېژندنې ادارې نن (شنبه) هم په دغه هېواد کې د یوه بل سېلاب د راتلو د احتمال په اړه خبرداری ورکړی دی.