د پاکستان د سوداګرۍ وزارت اعلان کړی چې د موقتي ترانزیتي اسنادو، ویزو او پاسپورتونو پرته د افغانستان د لاریو تګ راتګ منع دی.

آوا - کابل: د پاکستان د سوداګرۍ وزارت د یوې خبرپاڼې په خپرولو سره ویلي چې له نن (پنجشنبه، اسد ۱۱) وروسته به هغه افغان باروړونکي موټر چې موقتي ترانزیتي اسناد، ویزې او پاسپورتونه نه لري پاکستان ته د ننوتو اجازه ورنکړي.

په اعلامیه کې ویل شوي چې افغان لاریو چلوونکو ته اوس ډېر موقتي اسناد ورکړل شوي دي.

د خبرتیا پر بنسټ، هغه وسایط چې ټرانزیټ توکي لیږدوي له دې نوي فرمان څخه معاف دي.

د يادونې وړ ده، چې د پاکستان حکومت وخت په وخت له دغه هېواد سره په شريکو مرکزونو کې له افغانستان څخه د خلکو او لاريو پر تګ راتګ جدي بنديزونه لګوي.