آوا - کابل: د صادراتو د ملي ورځې د نمانځلو او د ۱۴۰۲ صادروونکو هېوادونو د قدردانۍ په موخه د کنفرانس په څنډه کې چې نن پنجشنبه د سرطان ۲۱ مه د افغانستان د سوداګرۍ او صنایعو وزارت له خوا جوړ شو. د اماراتو په نوم د یوه کورني تولیدي شرکت د مسوولینو او یوه چینايي شرکت ترمنځ تړون لاسلیک شو.

 

د تړون له مخې به د ۲۵ میلیونه ډالرو په ارزښت ۱۰ زره ټنه افغاني پنبه چین ته صادرېږي.

 

د افغانستان د پنبې د پروسس شرکت مسوولینو د دغه تړون له لاسلیکولو خوښي وښوده او ویې ویل چې د هېواد پنبه په نړۍ کې تر ټولو ښه کیفیت لري.

 

دوی د اسلامي امارت د صنعت او سوداګرۍ له وزارت څخه غوښتنه کوي چې د نړۍ بېلابېلو هېوادونو ته د کورنیو تولیداتو د صادرولو زمینه برابره کړي.

 

په همدې حال کې د اسلامي امارت لوړ پوړو چارواکو د صادراتو د ملي ورځې د نمانځلو په مناسبت په جوړ شوي کنفرانس کې اعلان وکړ چې د هېواد د صادراتو د زیاتوالي په موخه به سوداګرو او تولیدي شرکتونو ته ځانګړې اسانتیاوې برابرې کړي.