د اطلاعاتو او کلتور وزارت وايي، چې د دغه وزارت سرپرست په افغانستان کې د ناروې د سفارت له سرپرست سره په کتنه کې خبرې اترې او همغږي د ستونزو د حل یوازینۍ اساسي لاره وبلله.

آوا - کابل: د اطلاعاتو او کلتور وزارت مطبوعاتي دفتر د یوې خبرپاڼې په خپرولو سره ویلي چې د دغه وزارت سرپرست ملا خیرالله خیرخواه په افغانستان کې د ناروې د سفارت له شارژدافیر پاول سره په لیدنه کې وویل چې اسلامي امارت د نړۍ له هیوادونو سره دوه اړخیزې اړیکې پراخول غواړي.

په دې کتنه کې ښاغلي خیرخواه خبرې اترې او تفاهم د ستونزو د حل یوازینۍ اساسي لاره وبلله.

د ناروې سفارت سرپرست د افغانستان په اړه د دوحې د دریمې ناستې په اړه معلومات ورکړل او دغه ناسته یې د افغانستان لپاره مهمه وبلله.