د اوبو او انرژۍ وزارت د میدان وردګ ولایت په بهسودو ولسوالۍ کې د خلکو او پانګوالو په شخصي لګښت د ۵ میلیونه افغانیو په ارزښت د «طبیعت پیوستون بند» په نوم د اوبو د یوه بند د جوړولو کار پیل کړی دی.

آوا - کابل: د اوبو او انرژۍ وزارت مطبوعاتي دفتر نن چهارشنبه د جوزا ۹ مه د یوې خبرپاڼې په خپرولو سره ویلي چې د میدان وردګ ولایت د حصه اول بهسودو ولسوالۍ کې د اوبو د دغه بند د جوړېدو چارې پیل شوې. 

د دې برخې د پرانېستې په مراسمو کې د وردګو د سمندري حوزې مشر وویل، چې د برېښنا او اوبو وزارت د خلکو په همکارۍ په هېواد کې د ګڼو پروژو د تطبیق کار روان دی.

د افغانستان د انرژۍ او اوبو وزارت وايي، دغه بند به د ۱۲ مترو په لوړوالي او د ۲۰۰ مترو په اوږدوالي سره جوړ شي، چې د دوه میلیونه متر مکعب اوبو د ذخیره کولو ظرفیت به ولري او د تفریح ​​ځای به هم ولري.