د فواید عامې وزارت چارواکي وايي، چې دا مهال د تونل دننه د کانکریټو او ۱۶ ګیلریونو کار بشپړ شوی، خو له تخنیکي پلوه باید د کانکریټ کار له پای ته رسېدو ۲۸ ورځې تېر شي، څو د موټرو لپاره چمتو شي. د چارواكو په وينا، دغه لويه لار به ډېر ژر د ترافيكو پر مخ پرانيستل شي.

آوا - کابل: د فواید عامې وزارت ویاند محمد اشرف حق شناس په ټولنیزه شبکه ایکس کې یوه خبرپاڼه خپره کړې او لیکلي یې دي چې د سالنګ تونل د کانکریټي چارې بشپړې شوې دي.

ښاغلي حقیار زیاته کړه چې ډېر ژر به دغه لویه لاره د مسافرو پر مخ پرانیستل شي او تر هغه وخته پورې یې له خلکو وغوښتل چې پر دې لویه لاره له تګ راتګ ډډه وکړي او د دغه وزارت رسمي اعلان ته دې انتظار وباسي.

د يادونې وړ ده، چې د سالنګ تونل د بيارغونې چارې څو مياشتې وړاندې د فوايد عامې وزارت له خوا د بهرنيو چارو وزارت د اقتصادي مرستيال په همکارۍ پيل شوې وې.