پرون شنبه (د قوس ۱۲مه) د لوړو زده کړو وزیر او د هرات د سیمه ییزو چارواکو په حضور کې؛ د هرات پوهنتون څخه ۷۵۴۰ تنه محصلین د فراغت مراسم ولمانځل شول.

آوا - هرات: په دې مراسمو کې د هرات پوهنتون رییس مفتی عبدالغفار ابوالحکمت وویل، دغه پوهنتون د ځوانانو لپاره د ښوونیزو خدمتونو وړاندې کولو ته چمتو دی.

دغه راز د هرات ولايت مرستيال مولوي حيات الله مهاجر هم د ساينس په ارزښت خبرې وکړې او ويې ويل، چې دوى هڅه کوي، چې د ټولنې اړتياوې پوره کړي او علمي مرکزونه يې جوړ کړي.

مولوي مهاجر زیاته کړه: د ځوانو کارکوونکو او سالمې استفادې سره کولای شو د خپلې ټولنې اړتیاوې ژر تر ژره پوره کړو.

د هرات مرستیال والي څرګنده کړه: اسلامي امارت غواړي چې د ډاکټرانو او انجینرانو تر څنګ یو عالم او په دیني علومو کې تکړه شخص ولري.

له دې مراسمو وروسته د هېواد د لوړو زده کړو وزیر مولوي ندا محمد ندیم د هېواد ځوانانو ته په خطاب کې وویل: فکري مبارزه پیل کړئ او د علم په ترلاسه کولو سره د دښمن غلطو افکارو ته ماتې ورکړئ.

د لوړو زده کړو وزیر د دغه وزارت د فعالیتونو په اړه هم وویل: اسلامي امارت د پوهنې د نظام د پرمختګ لپاره کلک هوډ لري.

مولوي ندیم زیاته کړه: د هیواد د ښوونیز نظام د کیفیت د لوړولو په موخه د ټولو پوهنتونونو لپاره د لابراتوارونو، د کتابتونونو د غني کولو او د زیربناوو د جوړولو کار روان دی.

ښاغلي ندیم زیاته کړه: د هرات ولایت لپاره د دیني متخصصینو یوه ټولنه جوړه شوې او د تحصیلي بورسونو په برخه کې هم هڅې روانې دي.

د يادونې وړ ده، چې دغه ۷۵۴۰ تنه محصلين د هرات پوهنتون له ۱۶ بېلابېلو څانګو څخه فارغ شوي دي.

د يادونې وړ ده، چې هرات پوهنتون د هېواد په لوېديځ کې يو له سترو علمي مرکزونو څخه دى، چې د هېواد د ټولو ولايتونو زرګونه محصلين پکې په بېلابېلو برخو کې زده کړې کوي.