آوا - کابل: په اسلام اباد کې د افغانستان، پاکستان او ازبکستان ترمنځ درې اړخیزه سوداګریزه غونډه جوړه شوه.

 

په دې غونډه کې د افغانستان د صنایعو او سوداګرۍ وزارت سرپرست نورالدین عزیزي، د پاکستان د سوداګرۍ وزیر ګوهر اعجاز او د ازبکستان د لومړي وزیر مرستیال جمشید خاجیوف ګډون کړی و.

 

په اسلام اباد کې د افغانستان سفارت وايي، په دې کتنه کې د ټرانس-افغان اورګاډي د پروژې پر راتلونکو پړاوونو، درې اړخیزه سوداګرۍ او ټرانزیټ، د سیمه ییز اتصال پر شته ستونزو او اړوندو مسایلو خبرې وشوې.

 

ویل شوي، چې په دې ناسته کې د دواړو هېوادونو ترمنځ د درې اړخیزې سوداګرۍ او ترانزیتي ناستې د دقیقې متن د درې اړخیزو اقتصادي اړیکو پر پیاوړتیا او د سوداګرۍ د پراختیا له لارې د سیمه ییز اتصال پر پیاوړتیا، د ټرانزیټي اسانتیاوو پر زیاتوالي، د ګډو پانګونو پر زیاتولو او د لګښتونو د کمولو په اړه خبرې وشوې. د ګمرکي سیستم پر برښنایي کولو، د بانکي سیستم په پیاوړتیا او پراختیا، د خوراکي توکو خوندیتوب، د ویزو په صادرولو، د ټرانزیټي ستونزو پر حل او د درې اړخیزه ټرانزیټ په پیاوړتیا ټینګار شوی دی.

 

د پاکستان د سوداګرۍ وزیر ګوهر اعجاز پر خپله ایکس پاڼه لیکلي: «دا د اقتصادي اړیکو او سیمه ییز اتصال د پیاوړتیا لپاره یو مهم ګام دی. د سوداګرۍ، پانګونې او اتصال په برخه کې د دغو هېوادونو د متقابلو ګټو لپاره روښانه راتلونکی لیدل کېږي.