په نورستان کې د اسلامي امارت سیمه ییزو چارواکو د دغه ولایت د برګمټال ولسوالۍ په ځنګلونو کې د اورلګېدنې د دوام خبر ورکړی او وايي چې تر اوسه یې ۶۰ جریبه ځنګلونه سوځولي دي.

آوا - کابل: د نورستان ولایت د چاپیریال ساتنې امر سرتاج الدین صافی نن (پنجشنبه، ۹ سنبله) وویل چې د سلګونو سیمه ییزو اوسیدونکو په همکارۍ د اور د کابو کولو هڅې روانې دی.
 
د ښاغلي صافي په وینا، اورلګېدنه د روانې اونۍ د یکشنبې په ورځ د برګمټال ولسوالۍ د "نیک موک" په ځنګلونو کې پیل شوې او تر اوسه نه ده کابو شوې.
 
هغه زياته کړه، چې تر اوسه په ٦٠ جريبه ځنګل کې اور لګېدلى، چې ډېرى يې د جلغوزيو ونې په بشپړه توګه سوځېدلې دي.
 
په نورستان کې د اسلامي امارت د چاپېریال ساتنې رئیس د اور لګېدنې د علت په اړه څه ونه ویل.
 
د يادونې وړ ده، چې شاوخوا دوه مياشتې وړاندې هم د نورستان ولايت د کامدېش ولسوالۍ په ځنګلونو کې اور لګېدلى و او شاوخوا سل جريبه ځمکه يې د اور له كبله سوځولې وه.