آوا - غزني: د غزني ولایت د طبیعي پېښو پر وړاندې د مبارزې رئیس مولوي ابو ثابت پرون (پنجشنبه د ثور ۷) په دغه ولایت کې پر اړمنو کسانو د مرستو د وېش په اړه وویل: د تېر کال په اوږدو کې د غزني ولایت په مرکز او ولسوالیو کې د پېښو پر وړاندې د مبارزې ریاست او مرستندویه ادارو له لوري په غزني ولایت کې پر ۸۰ زره اړمنو کورنیو د خوراکي توکو او د پخلنځي توکي وویشل شول، چې په کې اوړه، وریجې، غوړي، دال او یو شمېر نور توکي شامل وو.

 

د دغه سيمه ييز چارواکي په وينا، تېر کال هم د دغه ولايت په مرکز او ولسواليو کې له ٣٠زره اړمنو کورنيو سره نغدي مرستې ووېشل شوې، چې ټولټال ٩٥٠ ميليونه افغانۍ کېږي.

 

د غزني د پېښو رئيس وويل، دغه مرستې په شفاف ډول پر مستحقو کسانو وېشل شوي، ځکه د مرستو له وېش مخکې د مستحقو کورنيو د پېژندنې په موخه هر اړخيزه څېړنه شوې وه.

 

په تېر کال کې نړیوالو سازمانونو تل په افغانستان کې د بې وزلۍ او لوږې په اړه خبرداری ورکړی دی. د مرستندویه موسسو په وینا، د افغانستان زیاتره وګړي مرستو ته اړتیا لري.