آوا: د هند غوره لیګ په نهمه لوبه کې، چې تېره شپه د کلکتې نایټ رایډرز او رویل چلېنجرز بنګلور ترمنځ ترسره شوه، اوپنر رحمان الله ګربز خپلې لومړۍ ۵۰ منډې وکړې.

 

کلکته لوبډلې ۲۰۵ منډې هدف ټاکلی و او د رایل چلېنجرز بنګلور لوبډلې یوازې ۱۲۳ منډې وکړې او لوبه یې وبایلله.

 

د کلکتې لوبډلې لپاره رحمان الله ګربز ۵۷ منډې وکړې او د کلکتې لوبډلې په بریا کې د ده منډو مهم رول ولوباوه.

 

کلکته نایټ رایډرز د هندي سینما د وتلي ستوري شاه رخ خان دی. شاه رخ خان چې تېره شپه یې دغه لوبه يي په ژوندی بڼه لیدله، د ښاغلي ګربز ستاینه وکړه.

 

رحمان الله ګربز لومړنی افغان لوبغاړی دی چې د هند غوره لیګ کې د توپ وهونکي په توګه لوبېږي. تر ده وړاندې راشد خان او یو شمېر نورو لوبغاړو په دې لیګ کې د بالرانو په توګه لوبېدلی دی.