آوا - مزارشریف: د داعش ترهګرې ډلې د اعماق خبری آژانس په یوه خبرپاڼه کښې اعلان کړی چې د دغې ډلې یو جنګیالی د دغه ولایت د والی له دفتره بهر په انتظار کښې وو او د هغه په ​​لور روان شو او چاودنه یې وکړه.

 

د بلخ د امنیه قوماندانۍ ویاند محمد اصف وزیري، آوا ته وویل: چاودنه د بلخ ولایت مقام په دوهم پوړ کې شوې، چې له امله یې د والي په ګډون دوه تنه وژل شوي دي.

 

د اسلامي امارت ویاند ذبیح الله مجاهد هم په یوه ټویټري پیغام کې تایید کړې، چې د بلخ والي محمد داوود مزمل نن سهار (پنجشنبه، حوت ۱۸) په خپل دفتر کې د ځای پر ځای شوي ماین په چاودنه کې وژل شوی دی.

,

مجاهد دا هم لیکلي، چې د بلخ د والي وژل د دښمنانو کار و او په اړه یې پلټنې پیل شوې دي.

 

په همدې حال کې د بلخ د حوزوي روغتون سرطبیب آوا ته وویل، چې د تېرې ورځې له چاودنې څخه دغه روغتون ته یو تن وژل شوی او اووه ټپیان ور وړل شوي دي.

 

دغه ځانمرګى بريد پرون سهار شاوخوا لس بجې د مزارشريف ښار په پنځمه ناحيه کې د بلخ د والي د دفتر په دويم پوړ کې شوى دى.