د افغانستان د سوداګرۍ او صنایعو وزارت چارواکي وايي، په تېرو اتو میاشتو کې څه باندې درې زره ټنه جلغوزي د سیمې هېوادونو، اروپا او امریکا ته صادر شوي دي. په ورته وخت کې کروندګر وايي چې سږ کال په هېواد کې د جلغوزو حاصلات شل سلنه کم شوي دي.

آوا - کابل: د صنایعو او سوداګرۍ وزارت ویاند عبدالسلام جواد د آوا له خبریال سره په مرکه کې ویلی چې په تېرو اتو میاشتو کې څه باندې ۲۲۰۰ ټنه جلغوزی چین ته صادر شوی دی.
 
هغه زياته کړه، چې د هوايي دهلېز له لارې شاوخوا ٨٠٠ ټنه د سوداګرو له خوا چين ته صادر شوي دي.
 
جواد ټینګار وکړ چې هڅه کوي د هوايي دهلېز له لارې له بېلابېلو هېوادونو سره وصل شي.
 
جاوید دا څرګندونې په داسې حال کې کوي چې چین په وروستیو کلونو کې د افغان جلغوزیو تر ټولو ستر بازار بلل کېږي.
 
د صنايعو او سوداګرۍ وزارت وياند وويل چې په دې موده کې د جلغوزيو نور ٨٠٠ ټنه نور د سيمې هېوادونو، اروپا او امريکا ته صادر شوي او د جلغوزيو د صادرولو هڅې دوام لري.
 
د صنايعو او سوداګرۍ وزارت د وياند د څرګندونو پر بنسټ، دوى هڅه کوي، چې سوداګرو ته د صادراتو په برخه کې لا زياتې اسانتياوې رامنځته کړي او نړيوالو بازارونو ته يې د لاسرسي زمينه برابره کړي.
 
په همدې حال کې د سوداګرۍ او پانګونې خونې مسوولین وايي چې په هېواد کې څه باندې درې زره ټنه جلغوزي شته چې د راتلونکي کال د ثور میاشتې مخکې باید صادر شي.
 
د دې خونې مرستیال خان جان الکوزي وویل چې جلغوزي تر ډېره د ژمي په میاشتو کې مصرفېږي او ټینګار یې وکړ چې د جلغوزیو پاتې برخه باید د ثور له میاشتې مخکې صادره شي.
 
هغه غوښتنه وکړه چې اسلامي امارت دې د سوداګرو بانکي ستونزې هوارې کړي تر څو وکولای شي خپل مالونه پر وخت بهر ته صادر کړي.
 
خو يو شمېر کروندګرو رسنيو ته ويلي، چې سږ کال په هېواد کې د جلغوزيو حاصلات شل سلنه کم شوي دي.
 
دا مهال په هېواد کې د يو کيلو جلغوزيو بيه ديارلس ډالره يا يوولس سوه افغانيو ته رسېږي. خو کله چې د چين بازارونو ته ورسيږي، بيه يې درې برابره لوړيږي.
 
د سوداګرۍ او پانګونې خونې د معلوماتو له مخې، په هېواد کې د جلغوزي کلنۍ سوداګريز ارزښت شاوخوا پنځه سوه مليونه ډالره اټکل شوى دى.
 
د يادونې وړ ده، چې وچه مېوه په ځانګړې توګه د هېواد له مهمو صادراتي توکو څخه شمېرل کېږي، چې د هېواد په ناخالص کورني توليد کې مهم رول لوبوي.