د افغانستان د اسلامي جمهوریت جمهور رئیس محمد اشرف غني نن ماښام د افغانستان د کرکټ د ملي ټیم لوبغاړو او روزونکو ته د کرکټ په نړیوال شل اوریزو سیالیو کې د ویسټ انډیز پر وړاندې د بریا مبارکي وویله.
جمهور رئیس د افغانستان د کرکټ د ملي ټیم لوبغاړو ته وویل، د کرکټ په نړیوالو شل اوریزو سیالیو کې ستاسو راڅرګندېدل او لوبېدل ستاسو د همېشنیو هڅو او ښو کړنو ښکارندوی دی.
د هېواد جمهور رئیس د کرکټ د ملي ټیم لوبغاړو ته په خطاب کې وویل، تاسو د افغانستان رښتیني اتلان یئ چې دغه اتلولي مو دا ځل او هر ځل په نړیوالو سیالیو کې ثابته کړې ده.
محمد اشرف غني د افغانستان د کرکټ د ملي ټیم له روزونکو انضمام الحق او منوج پراباکرڅخه چې یو یې د پاکستان او بل یې د هندوستان اوسېدونکي دی، له دې امله چې د کرکټ په برخه کې یې د افغانستان د کرکټ د ملي ټیم د لوبغاړو ښه روزنه کړې، مننه وکړه.
جمهور رئیس د افغانستان د کرکټ د ملي ټیم د لوبغاړو او روزونکو ګډ کار ته په اشارې وویل، دا د سیمې د هېوادونو د همکارۍ او ګډ کار لپاره الهام او ښه بېلګه ده.
دریافت صفحه با کد QR