د انتخاباتي شکایتونو کمیسیون وایي؛ د انتخاباتو د خپلواک کمیسیون له خوا د دوو غونډو د باطل شویو محلونو په ارتباط د ثبت شویو شکایتونو په اړه به سبا ته خپله پریکړه اعلان کړي.
د رایو د ابطال په دوهمه علني غونډه کې د انتخاباتو د خپلواک کمیسیون له خوا پنځه اویا محلونه باطل اعلان شول.
د انتخاباتي شکایتونو د کمیسیون ویاند نادر محسني نن خبریالانو ته وویل؛ چې د دغه باطل شویو محلونو په اړه د تحول او تدام ټیم له خوا پنځلس شکایتونه ثبت شوي دي.
خو د نوموړي په وینا، د انتخاباتو د خپلواک کمیسیون له خوا د انتخاباتي محلونو د ابطال د پرونۍ غونډې په اړه تر اوسه د کوم ټیم له خوا شکایتونه نه دي ثبت شوي.
د انتخاباتو خپلوا ک کمیسیون پرون په درېیمه علني غونډه کې د درېیو زرو محلونو په اړه خپله پریکړه اعلان کړه چې؛ په کې نهه شپیته محلونه باطل اعلان شول.