د افغانستان د انتخاباتو خپلواک کمیسیون وايي، هیڅوک حق نه لري چې د شخصي مسایلو لپاره د رایو د تفتیش بهیرله ستونزو سره مخامخ کړي.
د دغه کمیسیون ویاند نورمحمدنور نن په یوه خبري کنفرانس کې په دې اړه وویل:
″له دواړو کاندیدانو او د هغوی له تخنیکې استازو په جدیت غواړو چې د رایو د تفیتش په بهیر کې داسې پيښې ونه شوې.
د انتخاباتو خپلواک کمیسیون به د داسې پيښو د تکرار په صورت کې له انظباطي تدابیرو کار واخلي چې هیڅ ډول لفظي او فزیکې شخړه ونه شي.″
دا په داسې حال کې ده چې د جمهوري ریاست د دواړو کاندیدانو دوو څارونکو نن د رایو د تفتیش پر مهال فزیکې شخړه وکړه چې ویل کېږي یو تن پکې ژوبل شوی هم دی.
د انتخاباتو کمیسیون چارواکو همداراز وویل چې د جمهوري ریاست د دویم دور انتخاباتو د رایو ټول صندوقونه ددغه کمیسیون مرکزي دفتر ته رسیدلي دي.