د سولې د عالي شورا چارواکي پاکستان ته د سعودي عربستان د بهرنیو چارو د وزیر "سعود الفیصل سفر په افغانستان کې د سولې د راوستو په برخه کې ګټور بولي.
د دې شورا غړي او د نړېوالو اړیکو مشاور "اسماعیل قاسمیار" نن له ازادۍ راډيو سره په خبرو کې هیله وښوده چې دغه سفر به مهمې لاسته راوړنې ولري.
تمه ده چې د سعودي عربستان د بهرنیو چارو وزیر سبا د (دوشنبې) په ورځ پاکستان ته سفر وکړي.
نوموړي به د نورو مسایلو ترڅنګ په افغانستان کې د سولې له پروسې سره د همکاریو په اړه هم خبرې وکړي.
افغان حکومت تل له سعودي عربستان څخه غوښتي چې؛ د افغانستان د سولې له پروسې سره مرسته وکړي.