آوا - کابل: د اسلامی امارت ویندوی مولوی ذبیح الله مجاهد نن دوشنبه (قوس ۱۲مه) په ایکس چینل کې د یوې ویډیو په خپرولو سره د ټاپي پروژې د پرمختګ خبر ورکړ.

 

تر دې مخکې د اسلامي امارت لومړی وزیر ملا حسن اخند د ټاپي پروژې د عملي کار د پرانستلو په موخه د روان کال د سنبلی میاشتې په ۲۱ مه ترکمنستان ته تللی و.

 

د يادونې وړ ده، چې د دې پروژې لومړۍ برخه په ترکمنستان کې بشپړه شوې ده.

 

د ټاپي د ګازو د نل لیکې ټول اوږدوالی ۱۸۱۴ کیلومتره دی، چې ۲۰۷ کیلومتره یې د ترکمنستان له خاورې تېرېږي، ۷۷۴ کیلومتره یې د افغانستان له خاورې تېرېږي او ۸۲۶ کیلومتره یې د پاکستان له خاورې د هند له خاورې تېرېږي.

 

ټاپي په سیمه کې یوه له سترو اقتصادي پروژو څخه ګڼل کیږي او په داسې حال کې چې افغانستان به په کافي اندازه ګاز ترلاسه کړي، د ګازو د ترانزیت له حقه به هر کال شاوخوا ۴۰۰ میلیونه ډالره عاید ترلاسه کړي.